90 ఏళ్ల జపాన్‌ తాత బాడీబిల్డింగ్‌.. రోజూ ఏం తింటాడో తెలుసా?

90 ఏళ్ల వయసులోనూ బాడీబిల్డింగ్‌ కొనసాగింపు

• జపాన్‌కు చెందిన తోషిసుకే కనజావా 90 ఏళ్ల వయసులోనూ బాడీబిల్డింగ్‌ పోటీల్లో పాల్గొంటున్నారు.
• 90వ పుట్టినరోజు తర్వాత జరిగిన All Japan Masters Fitness Championshipsలో 85 ఏళ్లు పైబడిన విభాగంలో విజేతగా నిలిచారు.
• ఇది జాతీయ స్థాయిలో ఆయనకు 19వ టైటిల్‌. ప్రస్తుతం ప్రపంచ ఛాంపియన్‌షిప్‌లో పాల్గొనడం, ఆర్నాల్డ్‌ ష్వార్జ్‌నెగర్‌ను కలవడం ఆయన లక్ష్యాలు.

రోజూ ఏం తింటారంటే?

కనజావా మాంసం, చేపలను పూర్తిగా దూరంగా ఉంచుతారు. 50 ఏళ్ల వయసులో మళ్లీ బాడీబిల్డింగ్‌ ప్రారంభించినప్పటి నుంచి కఠినమైన శాకాహార ఆహారాన్ని పాటిస్తున్నారు.

ఆయన డైట్‌లో ప్రధానంగా బ్రౌన్‌ రైస్‌, నట్టో (పులియబెట్టిన సోయాబీన్స్‌), మిసో సూప్‌ ఉంటాయి.

వీటితో పాటు రోజుకు మూడు సార్లు ప్రొటీన్‌ సప్లిమెంట్స్‌ తీసుకుంటారు.

90 ఏళ్ల వయసులో ఈ డైట్‌ సరిపోతుందా?

ఉదయం బ్రౌన్‌ రైస్‌, నట్టో, మిసో సూప్‌ తీసుకుంటారు. మధ్యాహ్నం, రాత్రి భోజనంలో బ్రౌన్‌ రైస్‌కు కొద్దిగా ఫురికాకే అనే జపనీస్‌ మసాలా మిశ్రమాన్ని కలుపుకుని తింటారు.

ISIC మల్టీస్పెషాలిటీ హాస్పిటల్‌ చీఫ్‌ క్లినికల్‌ న్యూట్రిషనిస్ట్‌ హిమాంశి శర్మ ప్రకారం.. కనజావా డైట్‌లో కొన్ని ఆరోగ్యకరమైన అంశాలు ఉన్నాయి.

బ్రౌన్‌ రైస్‌లో కాంప్లెక్స్‌ కార్బోహైడ్రేట్లు, ఫైబర్‌ ఉంటాయి. నట్టో, మిసో వంటి పులియబెట్టిన ఆహార పదార్థాలు జీర్ణవ్యవస్థ ఆరోగ్యానికి ఉపయోగపడే పోషకాలను అందిస్తాయి.

వృద్ధాప్యంలో కండరాల బలం, కండర ద్రవ్యరాశిని కాపాడుకోవడం ముఖ్యమని నిపుణులు చెబుతున్నారు. అందుకు తగినంత ప్రొటీన్‌ తీసుకోవడం ఉపయోగపడుతుందని వివరిస్తున్నారు.

అయితే కనజావాకు సరిపోయే డైట్‌ అందరికీ సరిపోతుందని చెప్పలేమని స్పష్టం చేస్తున్నారు.

పండ్లు, కూరగాయలు కూడా ముఖ్యమే

కనజావా ఆహారంలో ఆరోగ్యకరమైన పదార్థాలు ఉన్నప్పటికీ.. ఆహారంలో వైవిధ్యం తక్కువగా ఉందని నిపుణులు చెబుతున్నారు. ముఖ్యంగా పండ్లు, కూరగాయలు, ఆరోగ్యకరమైన కొవ్వులు, వివిధ సూక్ష్మ పోషకాలు తగినంతగా అందకపోవచ్చని సూచిస్తున్నారు.

బ్రౌన్‌ రైస్‌, నట్టో, మిసో వంటి పదార్థాలను సమతుల్యమైన ఆహారంలో భాగంగా తీసుకోవచ్చు. హోల్‌గ్రెయిన్స్‌, పులియబెట్టిన ఆహార పదార్థాలు గట్‌ ఆరోగ్యానికి, శరీరంలో వాపు తగ్గించడానికి సహాయపడవచ్చని నిపుణులు చెబుతున్నారు.

అయితే ఆరోగ్యకరమైన వృద్ధాప్యానికి ఆహారం ఒక్కటే కారణం కాదు. క్రమం తప్పకుండా వ్యాయామం చేయడం, తగినంత నిద్ర, ఒత్తిడిని నియంత్రించడం, ఆరోగ్యకరమైన జీవనశైలి కూడా కీలకమని నిపుణులు చెబుతున్నారు.

భార్య కోసం మళ్లీ బాడీబిల్డింగ్‌లోకి..

కనజావా 34 ఏళ్ల వయసులో బాడీబిల్డింగ్‌కు స్వస్తి చెప్పారు. అయితే 50 ఏళ్ల వయసులో మళ్లీ ఈ రంగంలోకి వచ్చారు. తన భార్య అనారోగ్యానికి గురైన సమయంలో ఆమెను ఉత్సాహపరిచేందుకు పోటీల్లో పాల్గొనడం ప్రారంభించినట్లు గతంలో చెప్పారు.

ఆమె మరణించిన తర్వాత కూడా కనజావా బాడీబిల్డింగ్‌ను కొనసాగిస్తున్నారు. 90 ఏళ్ల వయసులోనూ పోటీల్లో పాల్గొంటూ యువతకు స్ఫూర్తిగా నిలుస్తున్నారు.

ప్రస్తుతం 60 ఏళ్లు పైబడిన విభాగంలో ప్రపంచ ఛాంపియన్‌షిప్‌లో పాల్గొనాలని ఆయన లక్ష్యంగా పెట్టుకున్నారు. తన బాడీబిల్డింగ్‌ కెరీర్‌లో మరో కలను కూడా నెరవేర్చుకోవాలని భావిస్తున్నారు. ప్రముఖ బాడీబిల్డింగ్‌ దిగ్గజం ఆర్నాల్డ్‌ ష్వార్జ్‌నెగర్‌ను కలవాలనేది ఆయన కోరిక.

దశాబ్దాల క్రితం కనజావా Mr. Universe పోటీల్లో పాల్గొన్న సమయంలో ష్వార్జ్‌నెగర్‌ Mr. Olympia పోటీల్లో పాల్గొనేవారు. ఇప్పుడు 90 ఏళ్ల వయసులోనూ పోటీల్లో పాల్గొంటున్న కనజావా.. తన అభిమాన బాడీబిల్డింగ్‌ దిగ్గజాన్ని కలవాలనే లక్ష్యంతో ముందుకు సాగుతున్నారు.