తమిళనాడు రాష్ట్ర రాజకీయాల్లో ఒక చారిత్రక ఘట్టం ఆవిష్కృతం కాబోతోంది. సుమారు 59 ఏళ్ల సుదీర్ఘ విరామం తర్వాత కాంగ్రెస్ పార్టీ అక్కడ మళ్లీ అధికారంలో భాగస్వామి కానుంది. ముఖ్యమంత్రి విజయ్ నేతృత్వంలోని తమిళగ వెట్రి కజగం ప్రభుత్వ క్యాబినెట్ విస్తరణకు సర్వం సిద్ధమైంది. గురువారం జరగబోయే ఈ ప్రతిష్టాత్మక విస్తరణలో భాగంగా కాంగ్రెస్ పార్టీకి చెందిన ఇద్దరు శాసనసభ్యులు మంత్రులుగా ప్రమాణ స్వీకారం చేయనున్నారు. ఈ విషయాన్ని కాంగ్రెస్ పార్టీ జాతీయ ప్రధాన కార్యదర్శి కేసీ వేణుగోపాల్ అధికారికంగా సామాజిక మాధ్యమం ఎక్స్ వేదికగా వెల్లడించారు. కాంగ్రెస్ అధిష్టానం తరఫున పార్టీ అధ్యక్షుడు మల్లికార్జున ఖర్గే ఇద్దరు ఎమ్మెల్యేల పేర్లను ఖరారు చేశారని తెలిపారు. కాంగ్రెస్ సీనియర్ నేతలు, శాసనసభ్యులైన అడ్వకేట్ ఎస్.రాజేష్ కుమార్, పి.విశ్వనాథన్లు విజయ్ మంత్రివర్గంలో చేరడానికి అనుమతి లభించిందన్నారు.
తమిళనాడు రాజకీయాల్లో గత దశాబ్దాలుగా ద్రావిడ పార్టీలైన డీఎంకే, అన్నాడీఎంకేల ఆధిపత్యం నడుస్తోంది. కాంగ్రెస్ పార్టీ గత పదేళ్లుగా డీఎంకేతో బలమైన మిత్రపక్షంగా కొనసాగుతున్నప్పటికీ, అక్కడ ప్రభుత్వంలో భాగస్వామ్యం పంచుకునే అవకాశం ఎప్పుడూ దక్కలేదు. ఇటీవలి ఎన్నికల ఫలితాల్లో విజయ్ నేతృత్వంలోని టీవీకే పార్టీ ఘనవిజయం సాధించి, మెజారిటీకి కేవలం కొద్దిపాటి సీట్ల దూరంలో నిలిచింది. తాము పోటీ చేసిన 28 స్థానాల్లో ఐదు సీట్లు గెలుచుకున్న కాంగ్రెస్ పార్టీ, డీఎంకే కూటమి నుంచి బయటకు వచ్చేసింది. ద్రావిడ రాజకీయాల మూస నుంచి తప్పుకుని, రాష్ట్రంలో లౌకిక ప్రభుత్వాన్ని ఏర్పాటు చేయడానికి విజయ్ పార్టీకి తమ పూర్తి మద్దతును ప్రకటించింది.
ముఖ్యమంత్రి విజయ్ మే 10వ తేదీన కేవలం తొమ్మిది మంది మంత్రులతో ప్రమాణ స్వీకారం చేశారు. పాలనపై మరింత పట్టు సాధించేందుకు వీలుగా గురువారం ఉదయం రాజ్ భవన్లో పూర్తి స్థాయి మంత్రివర్గ విస్తరణను చేపట్టనున్నారు. ప్రస్తుతం ముఖ్యమంత్రి విజయ్ వద్దే హోం, పోలీస్ శాఖలతో పాటు దాదాపు 20 కీలక పోర్ట్ఫోలియోలు ఉన్నాయి. గురువారం జరిగే ఈ విస్తరణలో సుమారు 14 మంది కొత్త మంత్రులు ప్రమాణం చేయనున్నారు. వీరిలో 12 మంది టీవీకే నుంచి ఉండగా, ఇద్దరు కాంగ్రెస్ నుంచి ఉంటారు. దీంతో కేబినెట్ మంత్రుల సంఖ్య 24కు చేరనుంది.