హైదరాబాద్: బంగారం, వెండి ధరలు వరుసగా తగ్గుతున్నాయి. గత కొన్ని రోజులుగా ఈ రెండు విలువైన లోహాల ధరలు దిగివస్తున్నాయి. పశ్చిమాసియాలో కొనసాగుతున్న యుద్ధం ప్రభావం అంతర్జాతీయ మార్కెట్లపై కనిపిస్తోంది. అదే ప్రభావం బంగారం, వెండి కొనుగోళ్లపైనా పడుతోంది.
ఇటీవల ధరలు తగ్గుతున్నప్పటికీ కొనుగోలు దారుల్లో పెద్దగా ఆసక్తి కనిపించడం లేదు. ఆర్థిక అనిశ్చితి, ఉపాధి అవకాశాలు తగ్గడం వల్ల ప్రజలు ఖర్చుల విషయంలో జాగ్రత్త పడుతున్నారు. దీంతో బంగారం, వెండి వస్తువుల కొనుగోళ్లు మందగించాయి. పెట్టుబడిదారులు కూడా గోల్డ్, సిల్వర్ వైపు పెద్దగా మొగ్గు చూపడం లేదని మార్కెట్ నిపుణులు చెబుతున్నారు.
బంగారం అంటే మహిళలకు ప్రత్యేకమైన మక్కువ ఉంటుంది. సాధారణంగా ధరలు తగ్గితే కొనుగోళ్లు పెరుగుతాయి. అయితే ప్రస్తుతం పరిస్థితి భిన్నంగా ఉంది. ప్రపంచవ్యాప్తంగా నెలకొన్న ఆర్థిక ఒత్తిళ్లు, ద్రవ్యోల్బణం, అంతర్జాతీయ మార్కెట్లలో ధరల హెచ్చుతగ్గులు, డాలర్తో పోలిస్తే రూపాయి బలహీనత, విదేశీ దేశాల్లో మాంద్య పరిస్థితులు, పశ్చిమాసియా యుద్ధ ప్రభావం కారణంగా ప్రజలు కొనుగోళ్లను వాయిదా వేస్తున్నారు.
గతంతో పోలిస్తే బంగారం, వెండి అమ్మకాలు గణనీయంగా తగ్గాయని జ్యువెలరీ దుకాణాల యజమానులు చెబుతున్నారు. పెళ్లిళ్లు, ఇతర శుభకార్యాలు తక్కువగా ఉండటం కూడా అమ్మకాలపై ప్రభావం చూపుతోంది. మదుపుదారులు సైతం ఈ లోహాల్లో పెట్టుబడులు పెట్టడంపై ఆసక్తి చూపడం లేదని వ్యాపార వర్గాలు పేర్కొంటున్నాయి.
ఇవాళ్టి ధరలు
ఈరోజు దేశీయ మార్కెట్లో బంగారం ధరలు తగ్గాయి. వెండి ధరల్లోనూ స్వల్ప తగ్గుదల నమోదైంది. ఉదయం 6 గంటలకు హైదరాబాద్ బులియన్ మార్కెట్లో నమోదైన ధరలు ఇవి.
- 22 క్యారెట్ల 10 గ్రాముల బంగారం ధర: ₹1,43,050
- 24 క్యారెట్ల 10 గ్రాముల బంగారం ధర: ₹1,56,060
- కిలో వెండి ధర: ₹2,84,900
మధ్యాహ్నానికి మార్కెట్ పరిస్థితులను బట్టి ధరల్లో మార్పులు ఉండే అవకాశం ఉంది.