భారత్–వెస్టిండీస్ సిరీస్‌కు రంగం సిద్ధం.. ఎక్కడ చూడాలంటే?

నాలుగేళ్ల తర్వాత భారత్‌కు వచ్చిన వెస్టిండీస్.. 8 వైట్-బాల్ మ్యాచ్‌లు

వన్డేల్లో రోహిత్ శర్మ, విరాట్ కోహ్లీ రీఎంట్రీ.. సెప్టెంబర్ 27 నుంచి సిరీస్

భారత్–వెస్టిండీస్ మధ్య 8 మ్యాచ్‌ల వైట్-బాల్ సిరీస్‌కు రంగం సిద్ధమైంది. నాలుగేళ్ల తర్వాత వెస్టిండీస్ జట్టు భారత పర్యటనకు వచ్చింది. 2022 ఫిబ్రవరిలో చివరిసారిగా భారత గడ్డపై పరిమిత ఓవర్ల సిరీస్ ఆడిన కరేబియన్ జట్టు.. ఇప్పుడు మరోసారి టీమిండియాతో తలపడనుంది.

ఈ పర్యటనలో ఇరు జట్లు 3 వన్డేలు, 5 టీ20లు ఆడనున్నాయి. సెప్టెంబర్ 27 నుంచి అక్టోబర్ 17 వరకు ఈ సిరీస్ కొనసాగుతుంది. ముందుగా వన్డే సిరీస్, ఆ తర్వాత టీ20 సిరీస్ జరగనుంది.

మైదానంలో రోహిత్–కోహ్లీ

ఇంగ్లండ్‌తో జరిగిన వన్డే సిరీస్ తర్వాత టీమిండియాకు దూరమైన రోహిత్ శర్మ, విరాట్ కోహ్లీ.. వెస్టిండీస్‌తో వన్డే సిరీస్ ద్వారా మళ్లీ మైదానంలోకి అడుగుపెట్టనున్నారు. దీంతో వన్డే సిరీస్‌పై క్రికెట్ అభిమానుల్లో ఆసక్తి నెలకొంది.

2027 వన్డే ప్రపంచకప్‌ను దృష్టిలో పెట్టుకుని భారత జట్టు నిర్మాణానికి ఈ సిరీస్ కీలకంగా మారనుంది. యువ ఆటగాళ్ల సామర్థ్యాలను పరీక్షించేందుకు కూడా ఈ సిరీస్ ఉపయోగపడనుంది.

భారత్–వెస్టిండీస్ వన్డే షెడ్యూల్

• సెప్టెంబర్ 27, 2026: తొలి వన్డే – మధ్యాహ్నం 2:00 గంటలకు – తిరువనంతపురం
• సెప్టెంబర్ 30, 2026: రెండో వన్డే – మధ్యాహ్నం 2:00 గంటలకు – గౌహతి
• అక్టోబర్ 3, 2026: మూడో వన్డే – మధ్యాహ్నం 2:00 గంటలకు – చండీగఢ్ (ముల్లన్‌పూర్)

టీ20 సిరీస్ షెడ్యూల్

• అక్టోబర్ 6, 2026: తొలి టీ20 – సాయంత్రం 7:00 గంటలకు – లక్నో
• అక్టోబర్ 9, 2026: రెండో టీ20 – సాయంత్రం 7:00 గంటలకు – రాంచీ
• అక్టోబర్ 11, 2026: మూడో టీ20 – సాయంత్రం 7:00 గంటలకు – ఇండోర్
• అక్టోబర్ 14, 2026: నాలుగో టీ20 – సాయంత్రం 7:00 గంటలకు – హైదరాబాద్
• అక్టోబర్ 17, 2026: ఐదో టీ20 – సాయంత్రం 7:00 గంటలకు – బెంగళూరు

తర్వాత న్యూజిలాండ్‌తో సిరీస్

వెస్టిండీస్‌తో సిరీస్ ముగిసిన తర్వాత టీమిండియా న్యూజిలాండ్ పర్యటనకు వెళ్లనుంది. ఈ సుదీర్ఘ పర్యటనలో భారత్ 2 టెస్టులు, 5 వన్డేలు, 5 టీ20లు ఆడనుంది.

ఐసీసీ ప్రపంచ టెస్ట్ ఛాంపియన్‌షిప్ (డబ్ల్యూటీసీ) దృష్ట్యా న్యూజిలాండ్‌తో జరగనున్న రెండు టెస్ట్ మ్యాచ్‌లు భారత జట్టుకు ముఖ్యమైనవి కానున్నాయి.