రక్షా బంధన్ యాడ్లో కృతి సనన్ డ్రెస్పై విమర్శలు
బాలీవుడ్లో ఫ్యాషన్, సంస్కృతికి సంబంధించిన వివాదం మరోసారి తెరపైకి వచ్చింది.
నటి కృతి సనన్ నటించిన ఓ ఆభరణాల ప్రకటనపై సోషల్ మీడియాలో తీవ్ర విమర్శలు వస్తున్నాయి.
ఈ యాడ్పై బాలీవుడ్ నటి, ఎంపీ కంగనా రనౌత్ కూడా ఘాటుగా స్పందించారు.
కృతి సనన్ డ్రెస్పై అభ్యంతరాలు
ఓ ప్రముఖ ఆభరణాల సంస్థ రక్షా బంధన్ సందర్భంగా ఈ ప్రకటనను విడుదల చేసింది.
ఇందులో కృతి సనన్ బ్రాలెట్-స్టైల్ బ్లౌజ్, స్కర్ట్తో కూడిన ఇండో-వెస్ట్రన్ దుస్తుల్లో కనిపించారు.
అయితే రక్షా బంధన్ వంటి సంప్రదాయ పండుగకు ఈ దుస్తులు సరిపోవంటూ కొందరు సోషల్ మీడియా యూజర్లు విమర్శించారు.
ఓ యూజర్.. “పండుగల కోసం దుస్తులు అమ్మడానికి మనం ఇప్పుడు సంస్కారాన్ని వదిలేయాలా?” అని ప్రశ్నించారు.
మరో యూజర్.. “రక్షా బంధన్కు, కాక్టెయిల్ పార్టీకి మధ్య ఉన్న తేడాను డిజైనర్ మర్చిపోయినట్లున్నారు” అని వ్యాఖ్యానించారు.
కంగనా రనౌత్ ఘాటు వ్యాఖ్యలు
ఈ వివాదంపై కంగనా రనౌత్ తన ఇన్స్టాగ్రామ్ స్టోరీలో కృతి సనన్ ఫొటోను షేర్ చేశారు.
నేటి మహిళ ప్రపంచ స్థాయికి ఎదిగిందని కంగనా అన్నారు.
కాక్టెయిల్ డ్రెస్సుల నుంచి చీరలు, బికినీల వరకు ఎన్నో రకాల దుస్తులు అందుబాటులో ఉన్నాయని పేర్కొన్నారు.
అయితే తన సోదరుడికి రాఖీ కట్టే సమయంలో ఎవరైనా బికినీ లేదా లోదుస్తులు ఎందుకు ధరిస్తారని కంగనా ప్రశ్నించారు.
“మీ స్టైలింగ్ ఎంపికలకు ఏమైంది?” అని నిలదీశారు. ఈ ప్రకటనను కావాలనే అసహ్యకరంగా రూపొందించినట్లు అనిపిస్తోందని ఆమె వ్యాఖ్యానించారు.
పెంపుడు కుక్కకు రాఖీ కట్టడంపైనా విమర్శలు
కంగనా రనౌత్తో పాటు సోషల్ మీడియాలో పలువురు మరో సన్నివేశంపైనా అభ్యంతరం వ్యక్తం చేస్తున్నారు.
ప్రకటనలో కృతి తన పెంపుడు కుక్కకు రాఖీ కట్టినట్లు చూపించారు.
రక్షా బంధన్ తోబుట్టువుల మధ్య అనుబంధాన్ని చాటిచెప్పే పండుగ అని, అలాంటి పండుగలో భారతీయ సంస్కృతి, సంప్రదాయాలను ఈ విధంగా చూపించడం సరికాదని కొందరు నెటిజన్లు వాదిస్తున్నారు.
అయితే ఈ వివాదంపై కృతి సనన్ లేదా ఆ ఆభరణాల సంస్థ ఇప్పటివరకు ఎలాంటి అధికారిక ప్రకటన చేయలేదు.
కంగనా చేసిన విమర్శలపైనా వారు స్పందించలేదు.