జీవో 97ను రద్దు చేయాల్సిందే.. పాలిటెక్నిక్ విద్యార్థుల పోరాటానికి కేటీఆర్ మద్దతు

విద్యార్థుల భవిష్యత్తుతో ప్రభుత్వం చెలగాటం ఆడొద్దన్న కేటీఆర్

తెలంగాణ ప్రభుత్వం తీసుకొచ్చిన వివాదాస్పద జీవో 97కు వ్యతిరేకంగా రాష్ట్రవ్యాప్తంగా పాలిటెక్నిక్ విద్యార్థులు చేస్తున్న ఆందోళనలకు బీఆర్‌ఎస్ వర్కింగ్ ప్రెసిడెంట్ కేటీఆర్ సంపూర్ణ మద్దతు ప్రకటించారు.

కాంగ్రెస్ ప్రభుత్వం తీసుకున్న ఈ నిర్ణయం వల్ల వేలాది మంది పాలిటెక్నిక్ విద్యార్థుల భవిష్యత్తు ప్రశ్నార్థకంగా మారిందని ఆయన ఆందోళన వ్యక్తం చేశారు.

‘విద్యార్థుల హక్కులను కాలరాయొద్దు’

కేటీఆర్ సామాజిక మాధ్యమం ‘ఎక్స్’ వేదికగా స్పందిస్తూ రేవంత్ రెడ్డి ప్రభుత్వంపై తీవ్రస్థాయిలో విమర్శలు చేశారు.

తమ న్యాయమైన హక్కుల కోసం శాంతియుతంగా నిరసన చేస్తున్న విద్యార్థుల పట్ల కొన్ని ప్రాంతాల్లో పోలీసులు అనుచితంగా ప్రవర్తించిన ఘటనలు తనను కలచివేశాయని చెప్పారు.

విద్యార్థుల ప్రాథమిక హక్కులను కాలరాయడం సరికాదని అన్నారు.

జీవో 97ను వెంటనే రద్దు చేయాలి

పాలిటెక్నిక్ విద్యార్థుల జీవితాలతో, ఉన్నత విద్యా భవిష్యత్తుతో ప్రభుత్వం చెలగాటం ఆడటం తగదని కేటీఆర్ హెచ్చరించారు.

వెంటనే జీవో 97ను బేషరతుగా రద్దు చేయాలని డిమాండ్ చేశారు.

ఇప్పటికే విద్యార్థులు చేపట్టిన వివిధ నిరసన కార్యక్రమాల్లో బీఆర్ఎస్ విద్యార్థి విభాగం (BRSV), పార్టీ ముఖ్య నాయకులు పాల్గొని ప్రత్యక్షంగా మద్దతు తెలిపారని గుర్తుచేశారు.

విద్యార్థుల పోరాటానికి బీఆర్ఎస్ అండ

సమస్య పరిష్కారమయ్యే వరకు పాలిటెక్నిక్ విద్యార్థుల న్యాయపోరాటానికి బీఆర్ఎస్ పార్టీ అన్ని విధాలుగా అండగా ఉంటుందని కేటీఆర్ స్పష్టం చేశారు.