‘Operation Kavach’ లో 5 వేల మంది పోలీసుల భాగస్వామ్యం
లాడ్జీలు, హోటళ్లలో బస చేస్తున్న వారి వివరాల పరిశీలన
హైదరాబాద్: ‘Operation Kavach’ లో భాగంగా నగరంలోని అన్ని పోలీస్ స్టేషన్ల పరిధిలో ఈ తనిఖీలు నిర్వహించినట్లు హైదరాబాద్ పోలీస్ కమిషనర్ వీసీ సజ్జనార్ తెలిపారు.
నగరంలో నేరాలకు పాల్పడే ప్రయత్నాలను అడ్డుకునే లక్ష్యంతో హైదరాబాద్ పోలీసులు శుక్రవారం రాత్రి లాడ్జీలు, హోటళ్లలో భారీ తనిఖీలు చేపట్టారు.
దాదాపు 5 వేల మంది పోలీసులు ఈ ఆపరేషన్లో పాల్గొన్నారని చెప్పారు. లాడ్జీల్లో బస చేస్తున్న వ్యక్తుల వివరాలను పరిశీలించామని, యాజమాన్యాలు నిర్వహిస్తున్న రికార్డులను కూడా తనిఖీ చేశామని వెల్లడించారు.
అసాంఘిక శక్తులు నగరంలో నేరాలకు పాల్పడకుండా ముందస్తు చర్యల్లో భాగంగానే ఈ తనిఖీలు చేపట్టినట్లు సజ్జనార్ చెప్పారు.
నేరాల నియంత్రణకు ప్రత్యేక చర్యలు
నగరంలో శాంతిభద్రతలు కాపాడటం, నేరస్తుల కదలికలపై నిఘా పెంచడం లక్ష్యంగా హైదరాబాద్ పోలీసులు తరచూ ‘Operation Kavach’ నిర్వహిస్తున్నారు. ఈ కార్యక్రమంలో లాడ్జీలు, హోటళ్లు, అనుమానాస్పద ప్రాంతాలు, వాహనాల తనిఖీలతో పాటు నేర చరిత్ర ఉన్న వ్యక్తుల కదలికలపై కూడా దృష్టి సారిస్తున్నారు.
నేరాలకు అవకాశాలు తగ్గించడం, ప్రజల్లో భద్రతాభావం పెంచడమే ఈ ప్రత్యేక డ్రైవ్ ప్రధాన ఉద్దేశమని పోలీసులు తెలిపారు.
చెవిలో ఫోన్లు పెట్టుకుని వాహనాలు నడిపితే చర్యలు
గత రోజు నగరవ్యాప్తంగా వాహనాల తనిఖీలు నిర్వహించిన సమయంలో కొందరు డ్రైవర్లు మొబైల్ ఫోన్లకు అనుసంధానించిన ఇయర్ఫోన్లు ఉపయోగిస్తూ వాహనాలు నడుపుతున్నట్లు గుర్తించామని సజ్జనార్ తెలిపారు.
అలాంటి వారిపై కేసులు నమోదు చేస్తామని చెప్పారు. ఈ అలవాటును అరికట్టేందుకు ప్రత్యేక డ్రైవ్ నిర్వహిస్తామని వెల్లడించారు.