ఈ టీచర్ మామూలోడు కాదు.. చిట్టీల పేరుతో కోట్లు వసూలు.. సీన్ కట్ చేస్తే..

నమ్మకమే పెట్టుబడిగా చిట్టీల దందా

ప్రభుత్వ ఉద్యోగం. సమాజంలో మంచి పేరు. విద్యార్థులకు నీతి, ఆదర్శాలు చెప్పాల్సిన బాధ్యత.

కానీ అదే ఉద్యోగాన్ని అడ్డుపెట్టుకుని ఓ ప్రభుత్వ టీచర్ భారీ మోసానికి పాల్పడ్డాడు. చిట్టీలు, డైలీ కలెక్షన్ల పేరుతో ప్రజల నుంచి కోట్ల రూపాయలు వసూలు చేశాడు.

చివరికి బాధితులు డబ్బులు తిరిగి ఇవ్వాలని ఒత్తిడి చేయడంతో కుటుంబంతో కలిసి పరారయ్యాడు.

సూర్యాపేట జిల్లా చివ్వెంల మండలం ఏనెగంటి తండాకు చెందిన బానోత్ రాజు ప్రభుత్వ టీచర్‌గా పని చేస్తున్నాడు.

ప్రస్తుతం ఆత్మకూర్ (ఎస్) మండలం శెట్టిగూడెం ప్రభుత్వ పాఠశాలలో ఉపాధ్యాయుడిగా విధులు నిర్వర్తిస్తున్నాడు.

మొదట వ్యాపారాల్లో నష్టం

బానోత్ రాజు గతంలో ఇటుక బట్టీలు, డెయిరీ వ్యాపారాలు నిర్వహించాడు. అయితే ఆ వ్యాపారాల్లో నష్టాలు వచ్చాయి.

దీంతో తక్కువ సమయంలో ఎక్కువ డబ్బు సంపాదించాలనే ఆలోచనతో చిట్టీల వ్యాపారం ప్రారంభించినట్లు పోలీసులు తెలిపారు.

తన భార్య అనూష సహకారంతో సూర్యాపేట రూరల్, చివ్వెంల పరిసర ప్రాంతాల్లో చిట్టీలు, డైలీ కలెక్షన్లు నిర్వహించాడు.

స్థానికుల నుంచి ప్రతిరోజూ రూ.2 లక్షల వరకు డబ్బులు వసూలు చేసినట్లు సమాచారం.

నమ్మకం పెంచుకున్నాడు

మొదట్లో చిట్టీల వ్యాపారం సజావుగానే సాగింది. ప్రతి నెలా డబ్బులు వసూలు చేశాడు.

పాట పాడుకున్న వారికి నమ్మకంగా డబ్బులు చెల్లించాడు. దీంతో రాజుపై స్థానికుల్లో నమ్మకం మరింత పెరిగింది.

ప్రభుత్వ టీచర్ కావడంతో అతడిని చాలామంది నమ్మారు. తోటి ఉద్యోగులు, వ్యాపారులు, తండాలకు చెందిన ప్రజలు తమ కష్టార్జితాన్ని రాజు చేతిలో పెట్టారు.

ఇలా ఒకటి కాదు.. రెండు కాదు.. లక్షలాది రూపాయల విలువైన పలు చిట్టీలు నిర్వహించాడు.

చిట్టీల గడువు పూర్తికావడంతో అసలు విషయం

చిట్టీల గడువు పూర్తయ్యింది. మరోవైపు కొందరు బాధితులకు పెళ్లిళ్లు, ఇతర అవసరాలు వచ్చాయి. దీంతో తమ డబ్బులు తిరిగి ఇవ్వాలని రాజును అడగడం ప్రారంభించారు.

బాధితుల నుంచి ఒత్తిడి పెరగడంతో రాజు ఫోన్ స్విచ్చాఫ్ చేశాడు. డబ్బులు ఇవ్వకుండా కాలయాపన చేశాడు. అప్పులు ఇచ్చిన వారి ఒత్తిడి కూడా పెరగడంతో కుటుంబంతో కలిసి పరారైనట్లు పోలీసులు గుర్తించారు.

దీంతో తమ కష్టపడి దాచుకున్న డబ్బులు తిరిగి రాకపోవడంతో బాధితులు ఆందోళనకు గురయ్యారు. తమ పిల్లల పెళ్లిళ్ల కోసం దాచుకున్న సొమ్ము కూడా పోయిందని కొందరు బాధితులు కన్నీరుమున్నీరవుతున్నారు.

పోలీసులను ఆశ్రయించిన బాధితులు

చివరకు బాధితులంతా కలిసి స్థానిక పోలీస్ స్టేషన్‌లో ఫిర్యాదు చేశారు. ఫిర్యాదులు అందుకున్న పోలీసులు దర్యాప్తు ప్రారంభించారు.

రాజు, అతడి భార్య అనూషకు సంబంధించిన ఆర్థిక లావాదేవీలను పోలీసులు పరిశీలిస్తున్నారు. బాధితుల వివరాలను సేకరిస్తున్నారు. చిట్టీలకు సంబంధించిన లెక్కలపై ఆరా తీస్తున్నారు. ప్రజల నుంచి వసూలు చేసిన నగదు ఎక్కడికి వెళ్లిందనే అంశాన్ని కూడా దర్యాప్తు చేస్తున్నారు.

రూ.6.24 కోట్లు వసూలు

పోలీసుల ప్రాథమిక విచారణలో కీలక విషయాలు వెలుగులోకి వచ్చాయి. రాజు బాధితుల నుంచి మొత్తం రూ.6.24 కోట్లు సేకరించినట్లు తేలింది.

అందులో రూ.3.18 కోట్లు తిరిగి చెల్లించినట్లు పోలీసులు గుర్తించారు. అయినప్పటికీ ఇంకా రూ.3.05 కోట్లకు పైగా బకాయిలు ఉన్నట్లు తెలిపారు.

విలాసాలకు, ఆస్తుల కొనుగోలుకు డబ్బు?

ప్రజల నుంచి వసూలు చేసిన కోట్లాది రూపాయలను రాజు తన వ్యక్తిగత అవసరాలకు ఉపయోగించినట్లు పోలీసులు గుర్తించారు. విలాసాలకు ఖర్చు చేసినట్లు కూడా ప్రాథమిక దర్యాప్తులో తేలినట్లు తెలిపారు.

అంతేకాదు.. ఆస్తులు కొనుగోలు చేయడానికి కూడా ఈ డబ్బును ఉపయోగించినట్లు పోలీసులు గుర్తించారు. దీనికి సంబంధించిన వివరాలపై పోలీసులు మరింత దర్యాప్తు చేస్తున్నారు.

కీలక పత్రాలు స్వాధీనం

దర్యాప్తులో భాగంగా బాధితుల నుంచి తీసుకున్న ప్రామిసరీ నోట్లు, చెక్కులు, బాండ్లు, భూముల లావాదేవీల పత్రాలను పోలీసులు స్వాధీనం చేసుకున్నారు.

ఈ పత్రాల ఆధారంగా బాధితులు ఎంత మొత్తంలో డబ్బులు ఇచ్చారు? ఎంత తిరిగి చెల్లించారు? ఇంకా ఎంత బకాయి ఉంది? అనే అంశాలను పోలీసులు పరిశీలిస్తున్నారు.

రాజు, అనూష అరెస్ట్

చిట్టీల పేరుతో ప్రజలను మోసం చేసిన కేసులో బానోత్ రాజుతో పాటు అతడి భార్య అనూషను పోలీసులు అరెస్ట్ చేశారు. వీరిద్దరిని సూర్యాపేటలో అరెస్ట్ చేసినట్లు సూర్యాపేట డిఎస్పి ప్రసన్న కుమార్ తెలిపారు.