గత నాలుగు నెలల్లో ఎన్నో ఒడిదుడుకులు ఎదురైనా ఆత్మవిశ్వాసం తగ్గలేదన్న యువ ఓపెనర్
హరారేలో అండర్-19 వరల్డ్ కప్ జ్ఞాపకాలను మరోసారి గుర్తు చేసుకున్న 15 ఏళ్ల బ్యాటర్
హరారే: గత నాలుగు నెలల్లో ఎన్నో ఒడిదుడుకులు ఎదురైనా తన ఆత్మవిశ్వాసం ఏమాత్రం తగ్గలేదని భారత యువ ఓపెనర్ వైభవ్ సూర్యవంశీ తెలిపారు.
జింబాబ్వేతో గురువారం ప్రారంభమయ్యే మూడు మ్యాచ్ల టీ20 సిరీస్కు ముందు మాట్లాడిన ఆయన, తన ప్రక్రియను నమ్ముకుని జట్టుకు 100 శాతం ఇవ్వడమే లక్ష్యమని చెప్పారు.
బీసీసీఐ విడుదల చేసిన వీడియోలో వైభవ్ మాట్లాడుతూ, “గత నాలుగు నెలల్లో చాలా ఒడిదుడుకులు వచ్చాయి. అవి క్రికెట్లో సహజం. ఇలాంటి పరిస్థితులు వస్తూనే ఉంటాయి. కానీ నేను నా ప్రక్రియను నమ్ముకుంటాను. జట్టు కోసం నా వంతు 100 శాతం కృషి చేస్తాను” అన్నారు.
కోచ్లు అవసరమైన ప్రతి సహాయాన్ని అందిస్తున్నారని, తనకు కావాల్సిన సాధన కూడా పూర్తిగా జరుగుతోందని చెప్పారు. ప్రస్తుతం మంచి ఆత్మవిశ్వాసంతో ఉన్నానని వెల్లడించారు.
ఈ జింబాబ్వే సిరీస్తో వైభవ్ మరోసారి హరారే స్పోర్ట్స్ క్లబ్ మైదానంలో అడుగుపెడుతున్నారు.
ఇదే వేదికపై ఈ ఏడాది ఫిబ్రవరిలో జరిగిన అండర్-19 వరల్డ్ కప్ ఫైనల్లో ఇంగ్లండ్పై 80 బంతుల్లో 175 పరుగులు చేసి భారత్కు టైటిల్ అందించడంలో కీలక పాత్ర పోషించారు.
ఈ మైదానం నాకు చాలా ప్రత్యేకం. నాలుగు నెలల క్రితం ఇక్కడే అండర్-19 వరల్డ్ కప్ ఫైనల్ గెలిచాం. భారత్కు ప్రాతినిధ్యం వహించడం ప్రతి క్రికెటర్ కల.
అదే మైదానంలో మళ్లీ భారత్ తరఫున ఆడటం ఎంతో ప్రత్యేకమైన అనుభూతిని ఇస్తోంది. ఈ క్షణాన్ని పూర్తిగా ఆస్వాదిస్తున్నాను అని వైభవ్ తెలిపారు.
సీనియర్ ఓపెనర్ సంజూ శాంసన్కు విశ్రాంతి ఇవ్వడంతో ఈ సిరీస్లో వైభవ్ టాప్ ఆర్డర్లో ఆడే అవకాశాలు ఉన్నాయి. ఐర్లాండ్, ఇంగ్లండ్లపై వరుసగా టీ20 సిరీస్లు కోల్పోయిన తర్వాత భారత్ పుంజుకోవాలని చూస్తోంది.
ఇది కూడా చదవండి
NEET పేపర్ లీక్పై ధర్మేంద్ర ప్రధాన్, అమిత్ షా రాజీనామా చేయాలి: రాహుల్ గాంధీ డిమాండ్
జింబాబ్వే పరిస్థితులపై ఇప్పటికే తనకు మంచి అవగాహన ఉందని వైభవ్ చెప్పారు.
అండర్-19 వరల్డ్ కప్ సమయంలో నేర్చుకున్న విషయాలను ఇప్పుడు కూడా ఉపయోగించి మంచి ప్రదర్శన ఇవ్వాలని భావిస్తున్నానన్నారు.
“ఇప్పటివరకు చేసిన సాధనపై పూర్తి నమ్మకం ఉంది. నా ఆటను నమ్ముకుని జట్టుకు ఎంతవరకు ఉపయోగపడగలనో అంతవరకు కృషి చేస్తాను.
ఈ మైదానంలో ఇప్పటికే రెండు మ్యాచ్లు ఆడాను. అవి నాకు బాగా కలిశాయి. అదే జోరును కొనసాగించేందుకు ప్రయత్నిస్తాను” అని వైభవ్ సూర్యవంశీ చెప్పారు.