తిరువళ్లూరులో కలకలం రేపిన ఘటన
నిందితుడు బిహార్కు చెందిన వలస కార్మికుడు
చిన్నారి మరణంతో విషాదంలో కుటుంబం
తిరువళ్లూరు: తమిళనాడు రాష్ట్రం తిరువళ్లూరు జిల్లాలో మానవత్వాన్ని మంటగలిపే దారుణ ఘటన వెలుగుచూసింది. ఇంటి సమీపంలో ఆడుకుంటూ కనిపించకుండా పోయిన మూడేళ్ల బాలికపై ఓ వలస కార్మికుడు లైంగిక దాడికి పాల్పడ్డాడు. తీవ్ర గాయాలతో ముళ్లపొదల్లో పడి ఉన్న చిన్నారిని స్థానికులు గుర్తించి ఆసుపత్రికి తరలించారు. అయితే చికిత్స పొందుతూ ఆమె ప్రాణాలు కోల్పోయింది. ఈ ఘటనపై కేసు నమోదు చేసిన పోలీసులు బిహార్కు చెందిన 19 ఏళ్ల వలస కార్మికుడు విబిన్ మంచ్ను అరెస్ట్ చేసి దర్యాప్తు కొనసాగిస్తున్నారు.
పరిచయం ఉన్న కుటుంబాలే.. అనుమానం రాకపోవడంతో ఘాతుకం
స్థానికులు, పోలీసులు తెలిపిన వివరాల ప్రకారం బాలిక కుటుంబం, నిందితుడు ఇద్దరూ అదే ప్రాంతంలో నివసిస్తున్న వలస కార్మికులు. రోజూ ఒకరినొకరు చూసుకునే కుటుంబాలు కావడంతో ఎలాంటి అనుమానం కలగలేదు. ఘటన జరిగిన రోజు బాలిక ఇంటి బయట ఆడుకుంటోంది. అదే సమయంలో నిందితుడు విబిన్ మంచ్ బిస్కెట్ ప్యాకెట్ ఇస్తానని ఆశ చూపి చిన్నారిని తన గదిలోకి తీసుకెళ్లాడు.
ఆ సమయంలో సమీపంలో ఉన్న ఓ మహిళ చిన్నారిని అతడు గదిలోకి తీసుకెళ్లడం గమనించింది. అయితే ఇరు కుటుంబాలు పరిచయం ఉన్నవే కావడంతో ఆమె ఎలాంటి అనుమానం వ్యక్తం చేయలేదు. ఇదే నిందితుడికి అవకాశం కల్పించినట్లు పోలీసులు భావిస్తున్నారు.
Also Read
సాయంత్రం వరకు కనిపించకపోవడంతో ఆందోళన
సాయంత్రం ఆరు గంటలు దాటినా చిన్నారి ఇంటికి తిరిగి రాకపోవడంతో తల్లి ఆందోళన చెందింది. చుట్టుపక్కల ప్రాంతాల్లో వెతకడం ప్రారంభించింది. బంధువులు, స్థానికులు కూడా గాలింపు చేపట్టారు.
కొంతసేపటి తర్వాత బహిర్భూమికి వెళ్లిన కొందరు స్థానికులు సమీపంలోని ముళ్లపొదల్లో చిన్నారి స్పృహ తప్పి పడి ఉండటాన్ని గుర్తించారు.
ఆమె పరిస్థితి అత్యంత విషమంగా ఉండటంతో స్థానికులు వెంటనే స్పందించారు. నీళ్లు తాగించి కుటుంబ సభ్యులకు సమాచారం అందించారు. అనంతరం తీవ్ర రక్తస్రావం, గాయాలతో ఉన్న చిన్నారిని సమీప ఆసుపత్రికి తరలించారు.
వైద్యుల ప్రయత్నాలు ఫలించలేదు
చిన్నారి పరిస్థితి ఆసుపత్రికి చేరుకునే సమయానికే ఆందోళనకరంగా ఉన్నట్లు సమాచారం. వైద్యులు అత్యవసర చికిత్స అందించినప్పటికీ ఫలితం లేకపోయింది.
తీవ్ర గాయాల కారణంగా చిన్నారి చికిత్స పొందుతూ మరణించింది. బాలిక మృతితో కుటుంబ సభ్యులు కన్నీరుమున్నీరయ్యారు. స్థానికంగా విషాద వాతావరణం నెలకొంది.
నిందితుడి అరెస్ట్.. దర్యాప్తు ముమ్మరం
ఘటనపై సమాచారం అందుకున్న పోలీసులు వెంటనే రంగంలోకి దిగారు. ప్రాథమిక విచారణ అనంతరం నిందితుడు విబిన్ మంచ్ను అదుపులోకి తీసుకున్నారు. అనంతరం అరెస్ట్ చేశారు.
ఘటనకు సంబంధించిన అన్ని కోణాల్లో ఆధారాలు సేకరిస్తున్నారు. చిన్నారిపై జరిగిన దారుణం స్థానికంగా తీవ్ర ఆగ్రహం రేకెత్తించింది. నిందితుడిపై కఠిన చర్యలు తీసుకోవాలని ప్రజలు డిమాండ్ చేస్తున్నారు.
Also Read