శ్రీవారి ఆలయ డిప్యూటీ ఈవో లోకనాథం ఇళ్లపై ఏసీబీ దాడులు.. రూ.5 కోట్ల అక్రమాస్తులు గుర్తింపు
తిరుమల తిరుపతి దేవస్థానం (టీటీడీ)లో ఉన్నతాధికారిగా పనిచేస్తున్న మెండు లోకనాథం అవినీతి వ్యవహారం వెలుగులోకి వచ్చింది.
శ్రీవారి ఆలయ డిప్యూటీ ఈవోగా పనిచేస్తున్న లోకనాథం ఆదాయానికి మించి ఆస్తులు కూడబెట్టారన్న ఆరోపణలతో అవినీతి నిరోధక శాఖ (ఏసీబీ) అధికారులు నిన్న ఏకకాలంలో దాడులు నిర్వహించారు.
తిరుపతిలోని లోకనాథం నివాసంతో పాటు ఆయన బంధువుల ఇళ్లలోనూ సోదాలు చేపట్టారు.
తొలిరోజు తనిఖీల్లోనే ప్రభుత్వ లెక్కల ప్రకారం సుమారు రూ.5 కోట్ల విలువైన అక్రమాస్తులను గుర్తించినట్లు ఏసీబీ అధికారులు తెలిపారు.
అయితే మార్కెట్ విలువ ప్రకారం ఈ ఆస్తుల విలువ మరింత ఎక్కువగా ఉండే అవకాశం ఉందని అధికారులు భావిస్తున్నారు. ఇవాళ కూడా సోదాలు కొనసాగనున్నాయి.
కిలోల కొద్దీ బంగారం.. నగదు స్వాధీనం
తిరుపతి పెద్దకాపు లేఅవుట్లోని లోకనాథం ఇంట్లో ఏసీబీ అధికారులు నిర్వహించిన సోదాల్లో భారీగా బంగారం, వెండి, నగదు బయటపడ్డాయి.
బీరువాలో దాచిన 2 కిలోల బంగారు ఆభరణాలు, 6.5 కిలోల వెండి వస్తువులను అధికారులు స్వాధీనం చేసుకున్నారు.
దీంతో పాటు రూ.12.50 లక్షల నగదును కూడా గుర్తించారు.
ఒక జీ+3 భవనం, మరో జీ+1 భవనానికి సంబంధించిన కీలక పత్రాలను అధికారులు గుర్తించారు.
లోకనాథం, ఆయన కుమారుడి పేరుతో బ్యాంకుల్లో ఉన్న నాలుగు ఫిక్స్డ్ డిపాజిట్లను కూడా గుర్తించారు.
అయితే లోకనాథం పేరుతో ఉన్న బ్యాంక్ లాకర్ను తెరిచి చూడగా అందులో ఎలాంటి వస్తువులు లభించలేదు.
భార్య, కుమారుడు, బంధువుల పేర్లతో ఆస్తులు
లోకనాథం తన ఆస్తుల్లో కొన్నింటిని కుటుంబ సభ్యులు, బంధువుల పేర్లతో కూడబెట్టినట్లు ఏసీబీ ప్రాథమిక విచారణలో తేలింది.
ఆయన భార్య మంజుల పేరుతో తిరుపతిలోని పెద్దకాపు లేఅవుట్లో ఒక ఇల్లు, గొల్లవానిగుంటలో రెండు ఇంటి స్థలాలు, వడమాలపేట మండలంలో ఒక ప్లాట్ ఉన్నట్లు అధికారులు గుర్తించారు.
ఆయన కుమారుడి పేరుతో తిరుపతి శ్రీనివాసనగర్లో ఓ ఇంటి స్థలం ఉన్నట్లు తేలింది.
లోకనాథం భార్య, మరొకరి పేరుతో ఉమ్మడిగా రూ.31.98 లక్షల విలువైన మరో ఆస్తి కూడా ఉన్నట్లు గుర్తించారు.
బావలు, సోదరుడి ఇళ్లలోనూ సోదాలు
సోదాల్లో భాగంగా లోకనాథం బావలు మునికృష్ణ, రమేశ్ ఇళ్లతో పాటు ఆయన సోదరుడు వేణు ఇంట్లోనూ ఏసీబీ అధికారులు తనిఖీలు నిర్వహించారు.
అక్కడ కూడా నగదు, బంగారంతో పాటు 10 ఎకరాల వ్యవసాయ భూమికి సంబంధించిన పత్రాలు లభించినట్లు సమాచారం.
కారుణ్య నియామకంతో ఉద్యోగంలో చేరి.. డిప్యూటీ ఈవోగా
లోకనాథం 1989 ఫిబ్రవరి 1న కారుణ్య నియామకం కింద టీటీడీలో జూనియర్ అసిస్టెంట్గా ఉద్యోగంలో చేరారు.
ఆ తర్వాత సీనియర్ అసిస్టెంట్, అసిస్టెంట్ ఈవో, డిప్యూటీ ఈవోగా పదోన్నతులు పొందారు.
ప్రస్తుతం శ్రీవారి ఆలయ డిప్యూటీ ఈవోగా విధులు నిర్వహిస్తున్నారు.
గతంలో తిరుచానూరు పద్మావతి అమ్మవారి ఆలయంలోనూ పనిచేశారు.
తిరుమలలోని లోకనాథం క్వార్టర్స్ను కూడా ఏసీబీ అధికారులు తమ అధీనంలోకి తీసుకున్నారు.
సోదాలు ఇంకా కొనసాగుతున్న నేపథ్యంలో అక్రమాస్తుల విలువ మరింత పెరిగే అవకాశం ఉందని అధికారులు భావిస్తున్నారు.
శ్రీవారి ఆలయంలో కీలక బాధ్యతల్లో ఉన్న అధికారి భారీగా అక్రమాస్తులు కూడబెట్టారన్న ఆరోపణలు రావడం తిరుపతిలో చర్చనీయాంశంగా మారింది.