యూకే ఉద్యోగాలు, వీసాల పేరుతో భారీ వసూళ్ల ఆరోపణలు
కేసుల పెరుగుదలతో లుక్అవుట్ నోటీసులు జారీ
హైదరాబాద్: సోషల్ మీడియాలో పేరుప్రఖ్యాతులు సంపాదించిన వారిని చూసి వెంటనే నమ్మేయొద్దని పోలీసులు హెచ్చరిస్తున్నారు. ముఖ్యంగా ఉద్యోగాలు, విదేశీ వీసాలు, పెట్టుబడుల పేరుతో వచ్చే ఆఫర్ల విషయంలో జాగ్రత్తగా ఉండాలని సూచిస్తున్నారు. ఇటీవల యూట్యూబ్లో పేరొందిన “నందూస్ వరల్డ్” జంటపై నమోదవుతున్న కేసులు ఈ హెచ్చరికలకు బలం చేకూరుస్తున్నాయి.
యూట్యూబ్లో ఫ్యామిలీ ఎంటర్టైనర్ కంటెంట్తో గుర్తింపు తెచ్చుకున్న నందూస్ వరల్డ్ ఛానల్కు భారీ సంఖ్యలో వీక్షకులు ఉన్నారు. ఈ ఛానల్ నిర్వహకులు అన్నే రమానందన, ఆమె భర్త జాగర్లమూడి మధుకర్. సోషల్ మీడియాలో సంపాదించుకున్న ప్రజాదరణను ఉపయోగించి పలువురిని మోసం చేశారంటూ వీరిపై ఫిర్యాదులు వెల్లువెత్తుతున్నాయి.
ఉద్యోగాల పేరుతో వసూళ్ల ఆరోపణలు
యూకేలో ఉద్యోగాలు ఇప్పిస్తామని, వీసాలు కల్పిస్తామని, వీసా రెన్యువల్స్ చేయిస్తామని చెప్పి నిరుద్యోగుల నుంచి భారీ మొత్తాలు వసూలు చేశారంటూ బాధితులు ఆరోపిస్తున్నారు. కొందరి నుంచి రూ.10 లక్షల నుంచి రూ.20 లక్షల వరకు తీసుకున్నట్లు ఫిర్యాదుల్లో పేర్కొన్నారు.
బాధితుల కథనాల ప్రకారం, సోషల్ మీడియాలో ఉన్న సెలబ్రిటీ ఇమేజ్ను నమ్మి అనేక మంది డబ్బులు చెల్లించారు. అయితే డబ్బులు తీసుకున్న తర్వాత ఉద్యోగాలు రాలేదని, వీసాలు కూడా రాలేదని వారు చెబుతున్నారు.
డబ్బులు తిరిగి ఇవ్వాలని అడిగితే బెదిరింపులు ఎదురయ్యాయని కొందరు ఆరోపిస్తున్నారు.
ఈ ఫిర్యాదుల ఆధారంగా హైదరాబాద్తో పాటు ఆంధ్రప్రదేశ్, తెలంగాణలోని పలు పోలీస్ స్టేషన్లలో కేసులు నమోదయ్యాయి. కేసుల తీవ్రత పెరగడంతో పోలీసులు దర్యాప్తు వేగవంతం చేశారు.
లుక్అవుట్ నోటీసులతో దర్యాప్తు ముమ్మరం
పోలీసుల సమాచారం ప్రకారం, జంట ప్రస్తుతం విదేశాల్లో ఉండటంతో లుక్అవుట్ నోటీసులు జారీ చేశారు. కేసులకు సంబంధించిన ఆధారాలను సేకరిస్తున్నారు.
మరికొందరు బాధితులు కూడా ముందుకు వచ్చి ఫిర్యాదులు చేస్తున్నట్లు తెలుస్తోంది.
రమానందన ఇటీవల సంక్రాంతి సందర్భంగా విడుదలైన ఓ సినిమాలో కూడా నటించారు. దీంతో ఆమెకు సోషల్ మీడియాలో మరింత గుర్తింపు వచ్చింది.
అదే గుర్తింపును ఆధారంగా చేసుకుని ప్రజలను నమ్మించారని బాధితులు ఆరోపిస్తున్నారు.
గుంటూరుకు చెందిన జాగర్లమూడి మధుకర్, అన్నే రమానందన దంపతులు ప్రస్తుతం లండన్లో స్థిరపడ్డారు. కేసులపై విచారణ కొనసాగుతోంది.
మేము ఎవరినీ మోసం చేయలేదు: రమానందన
ఇదిలా ఉండగా తమపై వస్తున్న ఆరోపణలను నందూస్ వరల్డ్ కుటుంబం ఖండిస్తోంది. తాము ఎవరినీ మోసం చేయలేదని రమానందన చెబుతున్నారు.
తమ పేర్లతో కొందరు కంపెనీలు ఏర్పాటు చేసి చేసిన మోసాన్ని తమపై మోపుతున్నారని ఆమె వివరణ ఇచ్చారు.
అయితే ఇప్పటికే పలు ప్రాంతాల్లో కేసులు నమోదు కావడం, విషయం విస్తృతంగా వెలుగులోకి రావడంతో మరిన్ని బాధితులు పోలీసులను ఆశ్రయిస్తున్నారు. దీంతో ఈ వ్యవహారం మరింత ప్రాధాన్యం సంతరించుకుంది.
Also Read