ఢిల్లీ మాస్టర్ ప్లాన్ 2047లో కీలక ప్రతిపాదన
భారత రాజధాని న్యూఢిల్లీలో పెరుగుతున్న ట్రాఫిక్ రద్దీని తగ్గించడంతో పాటు, భవిష్యత్తు రవాణా వ్యవస్థను ఆధునీకరించే లక్ష్యంతో కేంద్ర ప్రభుత్వం ఢిల్లీ మాస్టర్ ప్లాన్ 2047ను సిద్ధం చేసింది.
ఈ ప్రణాళికలో తొలిసారిగా ఎయిర్ టాక్సీలు, ఎయిర్ పాడ్ల వినియోగానికి అధికారికంగా చోటు కల్పించారు.
నగరంలో రవాణాను వేగవంతం చేసేందుకు పట్టణ విమానయాన రవాణా విధానాన్ని మాస్టర్ ప్లాన్లో చేర్చారు.
అయితే ఎయిర్ టాక్సీ సేవలు ఎప్పుడు ప్రారంభమవుతాయి, ఏ మార్గాల్లో నడుస్తాయి, ఏ సంస్థలు సేవలు అందిస్తాయనే వివరాలను ఇంకా ఖరారు చేయలేదు.
విమానయాన నియంత్రణ సంస్థల నుంచి అవసరమైన అనుమతులు వచ్చిన తర్వాతే ఈ సేవలు అందుబాటులోకి రానున్నాయి.
జెవర్ ఎయిర్పోర్ట్కు మెరుగైన కనెక్టివిటీ
నోయిడాలోని జెవర్ ఇంటర్నేషనల్ ఎయిర్పోర్ట్కు కనెక్టివిటీ పెంచేందుకు మాస్టర్ ప్లాన్లో ప్రత్యేక ప్రణాళికలు రూపొందించారు.
ద్వారక వైపు ఉన్న UER-2 నెట్వర్క్ను పొడిగించి నోయిడా, గ్రేటర్ నోయిడా, జెవర్ ప్రాంతాలను కలిపేలా స్ట్రాటజిక్ లింక్ 2 పేరుతో కొత్త కారిడార్ను ఏర్పాటు చేయనున్నారు.
IGI ఎయిర్పోర్ట్, జెవర్ ఎయిర్పోర్ట్ మధ్య ప్రయాణికులు, సరుకు రవాణా కోసం మల్టీ-లెవెల్ రోడ్డు, రైలు మార్గాలను అభివృద్ధి చేయాలని ప్రణాళికలో ప్రతిపాదించారు.
అత్యవసర సేవలకు హెలిప్యాడ్లు
అత్యవసర పరిస్థితుల్లో ప్రాణనష్టం తగ్గించేందుకు ఆసుపత్రులు, ఎత్తైన భవనాల పైకప్పులపై నిబంధనల ప్రకారం హెలిప్యాడ్ల ఏర్పాటుకు కూడా అవకాశం కల్పించారు.
వీటిని ఎయిర్ అంబులెన్స్ సేవలు, విపత్తు సహాయక చర్యల కోసం ఉపయోగించనున్నారు.
అదే సమయంలో గురుగ్రామ్, ఝజ్జర్, లోని-బాగ్పత్ ప్రాంతాల వైపు రవాణా కారిడార్లను మరింత బలోపేతం చేయాలని ఢిల్లీ మాస్టర్ ప్లాన్ 2047 లక్ష్యంగా పెట్టుకుంది.