ఉక్రెయిన్కు అండగా నిలుస్తామన్న బ్రిటన్, ఫ్రాన్స్, జర్మనీ
కాల్పుల విరమణతో పాటు భద్రతా హామీలపై దృష్టి
లండన్: ఉక్రెయిన్ అధ్యక్షుడు వోలోదిమిర్ జెలెన్స్కీ, బ్రిటన్ ప్రధాని కీర్ స్టార్మర్, ఫ్రాన్స్ అధ్యక్షుడు ఇమ్మాన్యుయేల్ మాక్రాన్, జర్మనీ చాన్స్లర్ ఫ్రెడ్రిక్ మెర్జ్ రష్యా-ఉక్రెయిన్ యుద్ధం ముగింపునకు ఐదు కీలక షరతులు ప్రకటించారు.
లండన్లో జరిగిన చర్చల అనంతరం విడుదల చేసిన సంయుక్త ప్రకటనలో వారు ఉక్రెయిన్కు తమ మద్దతు కొనసాగుతుందని స్పష్టం చేశారు.
ఈ ఐదు షరతుల్లో ముందుగా యుద్ధ చర్యలు నిలిపివేయడం, ప్రస్తుతం యుద్ధభూమిలో ఉన్న పరిస్థితుల ఆధారంగా చర్చలు ప్రారంభించడం, ఉక్రెయిన్కు బలమైన భద్రతా హామీలు కల్పించడం ఉన్నాయి.
అలాగే శాంతి ప్రక్రియలో అమెరికా భాగస్వామ్యం అవసరమని నేతలు మరోసారి పేర్కొన్నారు.
డొనాల్డ్ ట్రంప్ దృష్టి ప్రస్తుతం ఇరాన్-ఇజ్రాయెల్ ఉద్రిక్తతలపై కేంద్రీకృతమైన సమయంలో ఈ ప్రకటన వెలువడింది.
2022 ఫిబ్రవరిలో రష్యా పూర్తి స్థాయి దాడి ప్రారంభించిన తర్వాత కొనసాగుతున్న యుద్ధాన్ని ముగించేందుకు గత డిసెంబరులో అమెరికా రష్యా, ఉక్రెయిన్లపై ఒప్పందానికి రావాలని ఒత్తిడి తీసుకొచ్చింది.
ఇటీవలి రోజుల్లో ఇరు దేశాలు పరస్పర దాడులను మరింత పెంచాయి. రష్యా క్షిపణులు, డ్రోన్లతో ఉక్రెయిన్ నగరాలపై దాడులు చేస్తుండగా,
ఉక్రెయిన్ కొత్త సాంకేతికత సాయంతో రష్యా భూభాగంలో లోతైన ప్రాంతాల వరకు దాడులు చేసే సామర్థ్యాన్ని చూపుతోంది.
శనివారం రష్యాలోని రెండో అతిపెద్ద నగరం సెయింట్ పీటర్స్బర్గ్పై ఉక్రెయిన్ డ్రోన్లు దాడి చేశాయి.
అక్కడ ప్రధాన ఆర్థిక సదస్సు చివరి రోజు కార్యక్రమాలు సాగుతున్న సమయంలో ఈ దాడి జరిగింది.
దీనిని రష్యా అధికారులు “అభూతపూర్వం”గా పేర్కొన్నారు. అంతకుముందు కూడా అదే నగర శివార్లపై ఉక్రెయిన్ దాడులు చేసింది.
పుతిన్కు జెలెన్స్కీ బహిరంగ లేఖ
ఆర్థిక సదస్సుకు ముందు రోజు జెలెన్స్కీ, రష్యా అధ్యక్షుడు వ్లాదిమిర్ పుతిన్కు బహిరంగ లేఖ రాశారు. యుద్ధం ముగింపునకు ప్రత్యక్ష చర్చలు జరపాలని కోరారు.
అయితే పుతిన్ ఈ ప్రతిపాదనను తిరస్కరించారు. రష్యా లక్ష్యాలు నెరవేరిన తర్వాతే యుద్ధాన్ని ముగిస్తామని ఆయన చెప్పారు.
లండన్లో సమావేశమైన బ్రిటన్, ఫ్రాన్స్, జర్మనీ దేశాలు ‘ఈ3’ కూటమిగా గుర్తింపు పొందాయి. ఇవి ఉక్రెయిన్కు అత్యంత సన్నిహిత మద్దతుదారులుగా ఉన్నాయి.
భవిష్యత్ శాంతి ప్రక్రియలో భాగంగా ఉక్రెయిన్కు భద్రతా హామీలు ఇవ్వడానికి బ్రిటన్, ఫ్రాన్స్ కలిసి ‘కోయలిషన్ ఆఫ్ ది విల్లింగ్’ కార్యక్రమానికి నాయకత్వం వహిస్తున్నాయి.
జెలెన్స్కీ లేఖను ఈ దేశాలు స్వాగతించాయి. ఉక్రెయిన్, రష్యా మధ్య ప్రత్యక్ష చర్చలు జరగాలని, అందులో అమెరికా, యూరప్ దేశాలు చురుకుగా పాల్గొనాలని ఆయన చేసిన పిలుపునకు మద్దతు తెలిపాయి.
నాటోలో చేరాలన్న ఉక్రెయిన్ ఆకాంక్షను విరమించాలన్న రష్యా డిమాండ్ను పరోక్షంగా ప్రస్తావిస్తూ, ఉక్రెయిన్కు తన భద్రతా ఏర్పాట్లు, మైత్రి కూటములను స్వేచ్ఛగా ఎంచుకునే హక్కు పూర్తిగా గౌరవించాల్సిందేనని నేతలు స్పష్టం చేశారు.
చెర్నోబిల్ అణు కేంద్రం వద్ద డ్రోన్ దాడి
లండన్ చేరుకునే ముందు జెలెన్స్కీ రష్యాపై తీవ్ర విమర్శలు చేశారు. చెర్నోబిల్ అణు విద్యుత్ కేంద్రం సమీపంలోని వినియోగించిన అణు ఇంధన నిల్వ కేంద్రంపై డ్రోన్ దాడి జరిగిందని ఉక్రెయిన్ అధికారులు తెలిపారు.
ఈ ఘటనలో ఎవరూ గాయపడలేదు. మంటలను ఆర్పివేశారు. రేడియేషన్ స్థాయిలు సాధారణంగానే ఉన్నాయని అధికారులు వెల్లడించారు.
దక్షిణ ఉక్రెయిన్లోని జపోరిజ్జియా ప్రాంతానికి సమీప గ్రామంపై రష్యా దాడిలో కనీసం ముగ్గురు మరణించినట్లు అధికారులు తెలిపారు. ఇటీవల జపోరిజ్జియాపై రష్యా దాడులు తీవ్రంగా కొనసాగుతున్నాయి. శనివారం అక్కడ ఇద్దరు ప్రాణాలు కోల్పోయారు.
ఉక్రెయిన్ ప్రభుత్వ అణుశక్తి సంస్థ ఎనెర్హోయాటమ్ ప్రకారం చెర్నోబిల్లో వినియోగించిన అణు ఇంధన నిల్వ భవనానికి కొంత నష్టం జరిగింది. గాయాలు ఏవీ లేవని, మంటలను అదుపులోకి తీసుకువచ్చామని సంస్థ తెలిపింది.
రేడియేషన్ స్థాయిల్లో మార్పు లేదని వెల్లడించింది.
అణు భద్రతకు రష్యా ఉద్దేశపూర్వకంగా ముప్పు తెస్తోందని ఎనెర్హోయాటమ్ ఆరోపించింది. జెలెన్స్కీ కూడా ఇదే అభిప్రాయం వ్యక్తం చేశారు.
“రష్యా ఈ అణు మౌలిక సదుపాయ కేంద్రాన్నే లక్ష్యంగా చేసుకుంది. ఇది అత్యంత కీలక మౌలిక సదుపాయం. ఈ దాడి నీచమైన చర్య” అని జెలెన్స్కీ ఎక్స్లో పేర్కొన్నారు.
సోవియట్ కాలంలో చెర్నోబిల్గా పిలిచిన ఈ ప్రాంతంలో 1986లో జరిగిన పేలుడు ప్రపంచంలోనే అత్యంత ఘోరమైన పౌర అణు ప్రమాదంగా గుర్తింపు పొందింది.
ఆ ప్రమాదం వల్ల భారీగా రేడియోధార్మిక పదార్థాలు వాతావరణంలోకి వ్యాపించి యూరప్ అంతటా ఆరోగ్య సంక్షోభానికి దారితీశాయి.
గత ఏడాది కూడా చెర్నోబిల్లో దెబ్బతిన్న అణు రియాక్టర్పై ఏర్పాటు చేసిన రక్షణ కవచాన్ని రష్యా డ్రోన్ ఢీకొట్టింది.
ALSO READ